ბაგრატის ტაძრის კვლევა განახლდება 2008-01-24 ბაგრატის ტაძრის კვლევითი სამუშაოები გაზაფხულზე განახლდება. სპეციალისტების მიერ მოკვლეულ მასალებზე დაყრდნობით, მომზადდება დეტალური საპროექტო დოკუმენტაცია, რომელიც საფუძვლად დაედება ტაძრის სარეაბილიტაციო სამუშაოების დაწყებას. როგორც კულტურის, ძეგლთა დაცვისა და სპორტის სამინისტროში განაცხადეს, ბაგრატის ტაძრის სარეაბილიტაციო პროექტები განხილული, შეჯერებული და დამტკიცებული იქნება იუნესკოსთან მჭიდრო თანამშრომლობითა და რეკომენდაციით. 2005-2006 წელს კულტურის, ძეგლთა დაცვისა და სპორტის სამინისტროს დაფინანსებით ათწლეულების განმავლობაში პირველად დაიწყო ინტენსიური არქეოლოგიური კვლევა-ძიება ტაძრის ტერიტორიაზე. სწორედ ამ პერიოდში მთლიანად იქნა შესწავლილი ტაძრის ჩრდილოეთ ნავი, სამკვეთლო და სადიაკვნე, აფსიდის მიმდებარე ცენტრალური ტერიტორია. სამუშაოები 2006 წელსაც გაგრძელდა. 2006 წელს გაიხსნა 1003 წლის საკურთხევლისწინა მორთული იატაკი - მოკირული, წითელი, თეთრი და მონაცრისფრო ტონებში შესრულებული სამი ვარდული, ფერადოვანი სეგმენტებით, რომლის არსებობას ჯერ კიდევ ვახუშტი ბატონიშვილი აღნიშნავდა (XVIII ს.). ბაგრატის ტაძრის რეკონტრუქციის შესახებ განცხადება პრეზიდენტმა მიხეილ სააკაშვილმა ინაუგურაციის დღეს, 21 იანვარს გააკეთა. მისი თქმით, ტაძარი საქართველოს მთლიანობის სიმბოლოდ უნდა იქცეს. ინფორმაცია აღებულია საქართველოს საპატრიარქოს ოფიციალური საიტიდან.

ვულოცავთ ქუთათელ გაენათელ მიტროპოლიტს მეუფე კალისტრატეს წმინდა გიორგის ორდენით დაჯილდოებას. დაფასდა უდიდესი ღვაწლი და უმწიკვლო თავდადებული შრომა რომელსაც არ იშურებს ქუთაის გაენათის ეპარქიის საკეთილდღეოდ იმერეთის მართლმადიდებელი საზოგადოების სულიერი მოძღვარი – მისი ყოვლადუსამღვდელოესობა მიტროპოლიტი მეუფე კალისტრატე. ის დაჯილდოვდა წმინდა გიორგის ორდენით უწმინდესის და უნეტარესის საქართველოს კათალიკოს პატრიარქის ინტრონიზაციის 30 წლისთავთან დაკავშირებულ დღესასწაულზე. გულითადად ვულოცავთ ჩვენს მეუფეს ამ მოვლენას. უფალი ფარავდეს მას და მის მრევლს.

იმერეთის მედიცინის ვებგვერდის ეს რუბრიკა შეიქმნა ავტორთა საკუთარი სურვილით, ისე როგორც ყველა ჩვენთაგანს აქვს სახლში კუთხე ხატებისათვის,
ის არ წარმოადგენს ოფიციალურ საიტს და ატარებს მხოლოდ ინფორმაციულ ხასიათს.
მისმა ყოვლადმაღალუსამღვდელოესობამ, ქუთაის–გაენათის ეპარქიის მიტროპოლიტმა მეუფე კალისტრატემ გვიწყალობა სიტყვიერი თანხმობა იმაზე, რომ ამ რუბრიკამ იარსებოს იმერეთის მედიცინის ვებგვერდზე.
გთხოვთ მოგვაწოდოთ წინადადებები და რჩევები რუბრიკის უკეთესი ორგანიზაციისათვის.
ვებ გვერდების ავტორთა და პატრონთა საყურადღებოდ ვაცხადებთ, რომ საიტი აქტიურად იყენებს სხვა რესურსების შემოქმედებას მათი საავტორო უფლებების დაცვით. გთხოვთ ნუ ჩაგვითვლით პლაგიატად. თუ მიიჩნევთ ამას თქვენი საავტორო უფლების დარღვევად, მოგვწერეთ. ჩვენ უმორჩლესად მოგიხდით საჯაროდ ბოდიშს და თქვენი ინფორმაცია საიტიდან ამოიშლება.

ყოვლადწმინდა ივერიის ღვთისმშობლის ხატი ქუთაისის ყოვლადწმინდა ივერიის ღვთისმშობლის ხატის სახელობის ტაძარში უფალი შეეწია ჩვენს საიტს და კორესპონდენტის სახით გამოგვიგზავნა მამა არჩილი. მან მოგვაწოდა ეს სურათი. როგორც მოგეხსენებათ, ყოვლადწმინდა ივერიის ღვთისმშობლის ხატი ამჟამად მოგზაურობს მთელს საქართველოში, რათა შობას დაბრძანდეს სამების საკათედრო ტაძარში. ამ სურათზე ასახულია ის ბედნიერება, როდესაც მან ისურვა ამ ზაფხულს ჩემს ტაძარში ყოფნა. სურათზე თქვენ ხედავთ ქუთაის–გაენათის მიტროპოლიტს , მის ყოვლადუსამღვდელოესობას მეუფე კალისტრატეს.

წმიდა წერილი კატეხიზმო. ლოცვები საეკლესიო კალენდარი. რაც ამ კალენდარს მივაგენი, არცერთი შეკითხვა საეკლესიო თემაზე არავისთვის დამისვია. პირიქით. ეს პროგრამა ნამდვილად საჭირო ყოფილა. .